BENKI YA NBC YATOA SH.BILIONI 4 YA SEHEMU YA FAIDA YAKE KWA JAMII

 Benki ya Taifa ya Biashara (NBC) imetoa zaidi ya shilingi bilioni nne ya sehemu ya faida yake kwa jamii kwa kipindi cha miaka mitatu iliyopita, jitihada zinazolenga kutatua changamoto mbalimbali zinazoikabili jamii.

Mkurugenzi Mtendaji wa Benki hiyo, Theobald Sabi amesema Benki yake itaendelea kushirikiana na Serikali katika kufanikisha miradi mbalimbali ya maendeleo ikiwemo ile inayohusiana na afya.

“Leo, tunapozindua kituo hiki cha afya cha Kizimkazi kilichojengwa kwa zaidi ya shilingi bilioni 4.4, tunajivunia kuwa miongoni mwa wadau wakubwa waliofanikisha ujenzi wa kituo hiki muhimu.

Tumechangia kiasi cha shilingi milioni 400 katika ujenzi wa kituo hiki ambacho kitaleta ahueni kubwa katika upatikanaji wa huduma bora za afya kwa wakazi wa Kizimkazi na maeneo jirani, " amesema Sabi wakati wa hafla ya uzinduzi wa kituo hicho kilichopo Wilaya ya Kusini, Unguja, Zanzibar kilichojengwa kwa ushirikiano baina ya benki hiyo na wadau mbalimbali hususani Taasisi ya Samia Foundation, Taasisi ya Ahmed Al Falas Foundation.

Katika hafla hiyo, Rais Mstaafu Dkt. Jakaya Kikwete amesema ushirikiano na ubia baina ya serikali na wadau mbalimbali ikiwemo taasisi binafsi ni njia rahisi zaidi katika kuchochea kasi ya maendeleo kwa faida ya wananchi.

"Ushirikiano wa Serikali ya Mapinduzi ya Zanzibar na Taasisi ya Samia Foundation, Taasisi ya Ahmed Al Falas Foundation na Benki ya NBC hadi kufanikisha mradi huu ni muendelezo wa mifano mizuri ya kuigwa…hongereni sana,’’ amesema Dkt. Kikwete.