DIWANI SINGIDA AWATAKA WANANCHI KUWEKA FEDHA ZAO BENKI YA NBC

Meneja Maendeleo na Biashara wa Benki ya NBC Tawi la Singida, Olairivan Elineema, akizungumza kwenye mahafali ya 16 ya wahitimu wa kidato cha nne katika Shule ya Sekondari ya Dr. Ali Mohammed Shein yaliyofanyika mwishoni mwa wiki.

.................................

Imeandaliwa na Dotto Mwaibale, (0754-362990)

WANANCHI wa Kata ya Misughaa iliyopo Wilaya ya Ikungi Mkoa wa Singida, wametakiwa kuweka akiba za fedha zao kwenye Benki ya Taifa ya Biashara (NBC) ili ziweze kuwasaidia kwa mambo mbalimbali pamoja na kuwasomesha watoto wao.

Ombi hilo limetolewa na Diwani wa Kata hiyo, Selemani Musa wakati akizungumza kwenye mahafali ya 16 ya wahitimu wa kidato cha nne katika Shule ya Sekondari ya Dr. Ali Mohammed Shein yaliyofanyika mwishoni mwa wiki.

Awali akizungumza kwenye mahafali hayo diwani huyo aliwaomba wazazi na walezi kujenga tabia ya kutoa chakula kwa ajili ya lishe kwa wanafunzi wa shule hiyo wanapokuwa shuleni.

“Tujitahidi kuwa changia watoto wetu liche wakiwa shuleni ili waweze kusoma kwa mfululizo na bila ya kukosa chakula,” alisema Musa.

Alisema kuwatunza wanafunzi hao na kuwapa chakula kutawawezesha kufanya vizuri kwenye masomo yao ambapo aliomba utaratibu huo wa chakula uanzie shule za msingi.

Akizungumzia kuhusu utunzaji wa akiba za fedha zao alisema wananchi wengi wa kata hiyo ni wakulima hivyo wakishavuna na kuuza mazao yao aliwaomba fedha zao wakatunze kwenye Benki ya Taifa ya Biashara ambapo zitakuwa salama.

“Niwaombeni mkatunze fedha zenu benki kwani zitawasaidia kwa ajili ya kuwasomesha watoto wenu na kupata mahitaji yenu mengine,” alisema Musa.

Meneja Maendeleo na Biashara wa Benki ya NBC Tawi la Singida, Olairivan Elineema ambaye alikuwa mgeni rasmi kwenye mahafali hayo akizungumza kwa niaba ya Meneja wa benki hiyo tawi la Singida, alipongeza kazi nzuri inayofanywa na walimu kwa kuongeza ufaulu wa wanafunzi na akapongeza uratatibu wa utoaji wa lishe kwa wanafunzi ambapo benki hiyo itaendelea kutoa chakula kwa ajili ya watoto hao.

Aidha, Meneja huyo ametoa wito kwa wananchi watakaohitaji kupata elimu ya fedha wawasiliane na benki hiyo kwani muda wote wapo tayari kutoa elimu hiyo pasipo malipo yoyote.

Katika hatua nyingine Meneja huyo ameahidi kuwafungulia akaunti na kuwawekea Sh. 50,000 wanafunzi wa kwanza watatu watakaoongoza kufanya vizuri kwenye mtihani wao na kupata alama za juu.