BENKI YA NMB KUKOPESHA MABASI 100 YA MRADI WA MABASI YAENDAYO HARAKA (BRT)

 MSAJILI wa Hazina, Nehemiah Mchechu amesema amezungumza na Benki ya NMB kwa ajili ya kukopesha mabasi 100 ya mradi wa Mabasi Yaendayo Haraka (BRT), ili kutatua kero ya uhaba wa mabasi.

Mchechu ametoa kauli hiyo leo Jumatatu, Julai 15, 2024 alipozungumza na wahariri na waandishi wa habari jijini hapa kuhusu maandalizi ya kikao kazi cha wakuu wa taasisi na mashirika ya umma.

Kwa mujibu wa Mchechu, mabasi hayo yatakayofika ndani ya miezi sita kuanzia sasa, yatatoa huduma katika njia kuu pekee, huku katika njia za mlisho ikisubiriwa utaratibu mwingine.

“Kesho (Julai 16) nitakuwa na kikao na NMB (benki) kwa ajili ya ununuzi wa mabasi 100 na hivyo tutatatua changamoto ya uchache wa mabasi,” amesema.

Hata hivyo, amesema kwa njia zilizopo kunahitajika kampuni zaidi ya mmoja kwa ajili ya uwekezaji akipendekeza ziwe tatu au nne kwa awamu zote sita.

 (Imeandikwa na Juma Issihaka wa Gazeti la Mwananchi)