BENKI YA NMB YATOA MSAADA WA MADAWATI 100 SHULE YA MSINGI BIGUTU WILAYANI BUNDA

Viongozi wa NMB wakikabidhi dawati kwa mkuu wa wilaya ya Bunda

..............................................

Na Mwandishi Wetu, Bunda

Mkuu wa Wilaya ya Bunda, Dkt Vicent Naano amewataka Wanafunzi wa Shule ya Msingi, Bigutu iliyopo wilayani humo mkoani Mara kuyatunza madawati yaliyotolewa na Benki ya NMB kwa shule hiyo ili yadumu.

Naano aliyasema hayo Mei 29, 2024 wakati wa hafla ya kukabidhiwa madawati hayo katika shule hiyo iliyopo Kata ya Bunda Stoo wilayani Bunda.

“Wanafunzi hakikisheni mnayalinDa na kuyatunza madawati haya na kwa upande wenu walimu fanyeni kila linalowezekana kuyakarabati madawati yote yaliyoharibika jambo litakalo saidia kuwa na madawati ya ziada kwa matumizi ya wanafunzi wetu,”  alisema DC Naano. 

DC Naano ameishukuru Bank ya NMB kwa kutoa msaada wa madawati ambayo yana kwenda kuondoa changamoto ya wanafunzi hao kukosa madawati ya kukalia wakiwa shuleni.

Aidha  amewataka walimu wakuu wote wilayani Bunda na maafisa elimu ngazi ya kata kuhakikisha wanayakarabati madawati yote yaliyoharibika ili kupunguza changamoto ya watoto kukaa chini.

Mhe Naano  amesema kuwa katika wilaya hiyo kuna upungufu wa jumla ya madawati elfu 16 katika jumla ya shule 188. 

Kwa upande wake Diwani wa Kata ya Bunda Stoo Flaviani Chacha ameishukuru bank hiyo kuwa mdau wa karibu wa maendeleo huku akiwaomba wasiishie Bigutu tu bali waangalie namna ya kusaidia kwenye shule zingine. 

Naye Dotto Makota akikabidhi madawati hayo kwa niaba ya Meneja wa  NMB Kanda ya Ziwa alisema  baada ya kupokea maombi walikubali kutokana na kwamba wao ni wadau wa maendeleo ambo wanasaidia  si katika elimu tu bali pia katika sekta zingine ikiwemo afya na majanga mbalimbali yanapotokea

Wanafunzi wa Shule ya Msingi Bigutu wakiwa wamekaa kwenye madawati waliopewa na benki hiyo.

Mkuu wa Wilaya ya Bunda, Dkt Vicent Naano akizungumza na wanafunzi wa shule hiyo wakati wa kukabidhiwa madawati hayo.