BENKI YA NBC YATOA MSAADA WA VITI SHULE YA MSINGI BUGURUNI VIZIWI

Meneja Mahusiano ya Umma na Mawasiliano wa Benki ya NBC, Bi. Brendansia Kileo.(wa pili kulia) akimkabidhi moja ya kiti kati ya 49 mwanafunzi wa Shule ya Msingi Buguruni Viziwi jijini Dar es Salaam kwa niaba ya wanafunzi wenzake kwa ajili ya matumizi shuleni hapo. 

..............................

Na Mwandishi Wetu

BENKI ya NBC imekabidhi msaada wa viti 49 kwa matumizi ya wanafunzi wa Shule ya Msingi Buguruni Viziwi ya jijini Dar es Salaam ikiwa ni jitihada za Benki ya NBC kuboresha mazingira ya kusoma kwa wanafunzi wa shule ya Buguruni.

Hafla ya makabidhiano hayo imefanyika shuleni hapo ikihusisha uongozi wa shule hiyo pamoja na wanafunzi huku benki ya NBC ikiwakilishwa na maofisa wetu wakiongozwa na Meneja Mahusiano ya Umma na Mawasiliano, Bi. Brendansia Kileo.

Akizungumza katika hafla hiyo, Brendansia alisema msaada huo ni sehemu ya jitihada za Benki ya NBC kuunga mkono juhudi za Serikali na wadau mbalimbali hapa nchini katika kuboresha mazingira bora ya utoaji elimu.

“Ili wanafunzi hawa waweze kufaulu vizuri wanahitaji kusoma kwenye mazingira mazuri yenye miundombinu muhimu ikiwemo viti. Kwa kuliona hilo Benki ya NBC tumeona ni vyema tuitikie wito wa hitaji la wanafunzi hawa kwa kuwapatia viti hivi 49 ikiwa ni sehemu tu mahitaji yao mengine mengi. Tunaamini kwamba tutaendelea kushirikiana nao kwenye mahitaji mengine kadiri itakavyowezekana,’’ alisema Brendansia.

Akizungumza mara baada ya kupokea msaada huo, Mkurugenzi wa Mtendaji wa Chama Cha Kuhudumia Viziwi Tanzania, Bw. Yassin Mawe pamoja na kuishukuru Benki ya NBC kwa msaada huo, alisema viti hivyo vitaisadia shule hiyo kukabiliana na changamoto ya uhaba wa miundombinu ikiwemo viti, huku akitoa wito kwa wadau mbalimbali kuendelea kujitokeza ili kuisaidia shule hiyo.

#NBCDaimaKaribuNawe